Drejtoria Komunale e Arsimit në Suharekë organizoi ceremoninë solemne të ndarjes së mirënjohjeve për nxënësit e dalluar dhe talentët e rinj të komunës sonë, duke shënuar përmbylljen e suksesshme të vitit shkollor 2025/2026.
Në këtë aktivitet morën pjesë Kryetari i Komunës së Suharekës, z. Bali Muharremaj, Drejtori i Drejtorisë Komunale të Arsimit, z. Remzi Bajselmani, drejtorë shkollash, mësimdhënës, prindër, nxënës dhe mysafirë të tjerë.
Në fjalët e tyre përshëndetëse, Kryetari i Komunës dhe Drejtori i DKA-së vlerësuan angazhimin e nxënësve, mësimdhënësve dhe prindërve, duke theksuar rëndësinë e arsimit cilësor dhe mbështetjen e vazhdueshme institucionale për zhvillimin e talenteve të reja.
Gjatë ceremonisë u ndanë mirënjohje për nxënësit që kanë arritur rezultate të shkëlqyera në olimpiadat dhe garat komunale, shtetërore dhe ndërkombëtare në fushën e matematikës, fizikës, kimisë dhe gjuhës shqipe, duke përfaqësuar me dinjitet shkollat dhe Komunën e Suharekës.
Programi u pasurua me pika të shumta artistike të përgatitura nga nxënësit e institucioneve arsimore të komunës, përfshirë performanca muzikore, valle tradicionale, recitime dhe interpretime artistike që dëshmuan kreativitetin dhe talentin e brezit të ri.
Një moment i veçantë i ceremonisë ishte shpallja e nxënëses së dalluar të Komunës së Suharekës për vitin shkollor 2025/2026. Ky vlerësim iu nda nxënëses Altina Palushi, e cila arriti rezultate të jashtëzakonshme në Olimpiadën e Gjuhës Shqipe në të gjitha nivelet – shkollor, komunal, shtetëror dhe në garën Kosovë–Shqipëri, duke fituar vendin e parë dhe duke u bërë një shembull frymëzimi për të gjithë nxënësit.
Po ashtu, DKA ndau një mirënjohje të veçantë për nxënësen Eliza Grulaj, e cila në moshën 14-vjeçare botoi librin e saj “Populli ynë në sytë e një 14-vjeçare”, duke dëshmuar talent dhe përkushtim në fushën e letërsisë.
Në kuadër të ceremonisë u vlerësua edhe SHFMU “Destan Bajraktari”, nën udhëheqjen e drejtoreshës Merita Bajraktari, për rezultatet e shkëlqyera të arritura në procesin mësimor dhe në garat e ndryshme arsimore, kulturore dhe sportive.
Drejtoria Komunale e Arsimit falënderon të gjitha institucionet arsimore, mësimdhënësit, prindërit dhe nxënësit për kontributin e dhënë gjatë vitit shkollor 2025/2026 dhe uron të gjithë nxënësit për sukseset e arritura, duke iu dëshiruar pushime të këndshme verore dhe suksese të reja në të ardhmen.
Urime të gjithë nxënësve të shpërblyer dhe faleminderit të gjithë atyre që kontribuojnë çdo ditë në avancimin e arsimit në Komunën e Suharekës.
